د کرنې وزیر په کابل کې د پاکستان له سفیر سره وکتل: د دواړو هیوادونو ترمنځ د کرنیزو محصولاتو د سوداګرۍ وضعیت د ښه کېدو په اړه خبرې اترې

۷ مرغومي ۱۳۹۹
د کرنې، اوبولګولو او مالدارۍ وزیر ډاکټر انوارالحق احدي په خپل دفتر کې د پاکستان اسلامي جمهوریت له سفیر منصور احمد خان سره په کابل کې وکتل. دوی په دې لیدنه کې د دواړو هیوادونو تر منځ د کرنیزو محصولاتو د سوداګرۍ په اړه خبرې وکړې.
په دې لیدنه کې، ښاغلي احدي د کرنیزو محصولاتو، په ځانګړي ډول د میوو په فصلونو کې د سوداګریزو اړیکو پر ښه والي سربیره ، ټینګار وکړ چې د میوو په فصلونو او نورو کرنیزو تولیداتو کې باید د دواړو هیوادونو پولې خلاصې وي.
د کرنې وزیروویل، چې وخت په وخت له پاکستان سره د کرنیزو محصولاتو په سوداګرۍ کې ستونزې پیدا کیږي، چې دا مسلې باید تر بحث لاندې ونیول شي او ستونزې باید په دوه اړخیزه توګه حل شي.
دغه راز ښاغلي احدي وویل، چې د ګمرکي تعرفې باید په موسمي ډول تغیر ونه کړي، او دواړه خواوې باید ډیر تعامل ولري ، ځکه چې دواړه هیوادونه د یو بل د تولیداتو بازار جوړوي.
په دې ناسته کې د کرنیزو محصولاتو سوداګرۍ په برخه کې  د پاکستان له سفیر سره هوکړه وشوه، چې ځانګړې موضوعات او  ستونزې د حل لپاره د یوه هئیت وټاکل شي، ترڅو د ګمرکي تعرفې په بیلابیلو کرنیزو موسمونو کې بدلون ونکړي.
د پاكستان سفير په دې لیدنه کې خوشبيني څرګنده كړه چې د دواړو هېوادونو ترمينځ تجارتي اړيكې به وده او پراختيا ومومي.