د کرنې وزارت سرپرست: په ۱۴۰۰ مالي کال کې د تولید ترڅنګ پر بازار موندنه هم تمرکز کوو
۳۱ وږی ۱۳۹۹
د کرنې وزارت سرپرست او نوماند وزیر ډاکټر انوارالحق احدي، د یاد وزارت مرستیالانو، رییسانو او د کرنې وزارت د پروژو د چارواکو په شتون کې اداري غونډه وشوه.
په دې غونډه کې، د پروژو د پلي کېدو د پرمختګ پر لړۍ او د راتلونکي کال پر مالي پلان خبرې اترې وشوې.
د پلان او پالیسۍ لوی رییس شکیب شریفي او د مالي ریاست چارواکو د پروژو د کاري پرمختګونو، د بودیجې د لګولو او د راتلونکي مالي کال د پلان د طرحې په هکله اړین توضیحات وړاندې کړل.
په همدې حال د کرنې، اوبولګولو او مالدارۍ وزارت سرپرست او نوماند وزیر ډاکټر انوارالحق احدي وویل، چې د بودیجې معقول لګول او پر خپل وخت پروژې پلي کول ډېر اړین دي.
د کرنې وزارت چارسمبال د بودیجې د اغېزناک لګولو پر اهمیت او پر خپل وخت د پروژو پر پلي کېدو ټینګار وکړ او وویل، چې راتلونکی مالي کال لپاره د کرنې په برخه کې یوشمېر لومړیتوبونه لري. هغه وویل، له پروژو څخه تمه داده، چې د بودیجې مصرف اغېزناک او هم د بودیجې د لګولو کچه په سمه توګه وي.
ښاغلی احدي دغه راز وویل، که ښې برنامې او طرحې جوړې شي، کولای شو چې په سمه توګه له مسوولو بنسټونو د پیسې غوښتنه وکړو.
د کرنې وزارت سرپرست وویل، چې راتلونکی کال به هم د کرنیزو محصولاتو پر زیاتوالی او هم په نړیواله کچه کرنیزو تولیداتو ته د بازارموندنې په برخه کې تمرکز وشي.
