د ننګرهار ثمرخېلو قوريه کې د پالونيا ګټور بوټي د روزنې او تکثير چارې روانې دي

ننګرهار وادي کرنيز امارتي شرکت د خپلو کرنيزو او نيالګيو روزنيزو فعاليتونو د پراختيا په موخه د هډې فارم ثمرخېلو قوريه او شته فارمونو کې د پالونيا بوټي روزنې ته ځانګړې پاملرنه کړې ده.
پالونيا چې له اقتصادي، چاپېريالي او صنعتي پلوه يو ګټور بوټی بلل کېږي، د لرګيو د لوړ کيفيت، چټکې ودې او پراخ استعمال له امله په نړۍ کې ځانګړی ارزښت لري.
د ثمرخېلو قوريي مسؤل مدير پوپل عليخېل په وينا، د ثمرخېلو قوريه کې يې تر اوسه شاوخوا ۲۰۰۰ قلمې د پالونيا بوټي اخيستل شوې دي، چې که اقليمي او طبيعي شرايط ورسره مناسب پاتې شي، نو په راتلونکې کې به د حاصل مرحلې ته ورسېږي.
پالونيا بوټی د فرنيچر جوړونې، لرګي صنعت، سينګاري چارو او يو شمېر نورو صنعتي برخو کې پراخه ګټه لري، چې د کرنې ترڅنګ اقتصادي ارزښت هم لري.