بزګرانو ته د بدیلو معیشتونو رامنځته کولو په پار هلمند کې د څاڅکې اوبولګولو د پروژې پرانیسته

۱۷ لړم ۱۴۰۴ هـ.ش
۱۷ جُمَادَى الأول ۱۴۴۷ هـ.ق
د افغانستان اسلامی امارت د کرنې، اوبولګولو او مالدارۍ وزارت هغو بزګرانو ته چې د کوکنارو له کرکیلې څخه لاس اخیستی او د بدیلو کښتونو پر لور یې مخه کړې، د بدیل معیشت د رامنځته کولو په موخه په هلمند ولایت کې د څاڅکي اوبولګولو پروژه پرانېسته.
یاده پروژه د کرنې وزارت د بدیل معیشت ریاست له بودیجې څخه د ۱۲ میلیونه او ۵۷۳ زره او ۱۲۱ افغانیو په لګښت تمویل شوې او د ۲۱۳ جریبه ځمکې په ساحه کې ۲۱۳ بڼوالو لپاره د کجکي، موسی‌قلعه، نهرسراج، لشکرګاه او خانشین په ولسوالیو کې پلي کېږي.
د دې پروژې د پلي کولو مسؤلیت د «داوري هلمند» لوژستیکي شرکت په غاړه لري، او په دې پروژه کې به په دغو بڼونو کې ۲۶ زره او ۶۲۵ نیالګي کېنول شي.
د پروژې د پرانېستنې مراسم د کرنې وزارت د اطلاعاتو او عامه پوهاوي رییس مولوي شیرمحمد حاتمي، د هلمند د کرنې، اوبولګولو او مالدارۍ رییس مولوي نیازمحمد وهاج، د کرنې ریاست د یو شمېر کارکوونکو، سیمه‌ییزو متنفذینو او د سیمې د اوسېدونکو په حضور کې ترسره شول.
د کرنې، اوبولګولو او مالدارۍ وزارت ژمن دی، چې د ورته پروژو د پلي کولو له لارې به د هېواد په نورو ولایتونو کې هم د بزګرانو لپاره د حلال او پایدار معیشت زمینه برابره کړي.