فاریاب ولایت کې د اقلیمي بدلونونو د پوهاوي روزنیز پروګرامونه ترسره شول

د کرنې وزارت د کرنې او مالدارۍ سکټور د اقلیمي بدلونونو سره د سازښت ریاست د فاریاب د کرنې ریاست په همغږۍ ددې ولایت په مرکز او څلورو ولسوالیو کې د بېلابېلو کلیو ۱۵۰ تنو بزګرانو او کلیوالو ته د اقلیمي بدلونونو په اړه د پوهاوي روزنیز پروګرامونه په لاره واچول.
یاد روزنیز پروګرامونه د فاریاب ولایت د مرکز سربېره، پشتونکوت، خواجه سبزپوش، شرین تگاب او المار په ولسوالیو کې هم ترسره شوه.
د دې برنامې موخه د کرنې او مالدارۍ په سکتور کې د اقلیمي بدلونونو د اغېزو پر وړاندې د خبرداري سیستم فعالول او د سیمې د معلوماتو راټولول دي، څو دغه سکتور د نوو اقلیمي شرایطو سره ښه عیار شي.
د کرنې وزارت د کرنې او مالدارۍ سکټور د اقلیمي بدلونونو سره د سازښت ریاست د یخ‌نۍ او طبیعي پېښو د تحلیل او ماډل جوړونې متخصص انجنیر دواجان همت وویل، چې په دغو پروګرامونو کې دفاریاب ولایت د اقلیمي وضعیت، د اقلیم او اقلیمي بدلون، د اقلیمي بدلون د عواملو، پر کرنه او مالدارۍ سکتور د هغه د اغېزو، د سازګارۍ او سازښت لارو چارو او همدارنګه د مخکني خبراوي سیستم په اړه تفصیلي معلومات وړاندې شول.
ښاغلی همت وویل، چې ددغو پروګرامونو په ترڅ کې له اقلیمي بدلون سره د سازښت او مبارزې په تړاو او نورو چاپېریالي طبیعي پېښو په اړه ګډونوالو ته معلوماتي پرېزنټېشنونه وړاندې شوي دي.
ګډونوالو د دغو برنامو له جوړېدو خوښي څرګنده کړه او ټینګار یې وکړ، چې دا ډول روزنیزې برنامې د کرنیزو زیانونو په کمولو، د بزګرانو د مهارتونو په لوړولو او د اقلیمي بدلونونو پر وړاندې د عملي تدابیرو په پیاوړتیا کې اغېزمن رول لري.
د کرنې وزارت د کرنې او مالدارۍ سکټور د اقلیمي بدلونونو سره د سازښت ریاست وايي، چې ورته برنامې به د نورو ولایتونو په کچه هم د سیمه‌ییزو بزګرانو په ګډون ترسره شي.