د کندهار بولدک کې د ۱.۲ میلیونه افغانیو په لګښت د کانال رغنیزې چارې پیل شوې

د کندهار دکرنې، اوبولګولو او مالدارۍ ریاست له خوا د ملګرو ملتونو د پراختیایي ادارې«یو،ان،ډي،پي» په همکارۍ ددې ولایت د بولدک ولسوالی د ستون کاریز په سیمه کې د ۱.۲ میلیونه افغانیو په لګښت د اوبو لګولو کانال رغنیزې چارې پیل شوې.
د کندهار دکرنې ریاست چارواکي وایي، چې دغه کانال به ۷۷۵ متره اوږدوالی، ۳۰ سانتي‌متره لوړوالی او ۳۰ سانتي متره پراخوالی ولري. د دوی په وینا، چې د یاد کانال رغنیزي چارې به د د دوو میاشتو په موده کې بشپړ او ګتې اخیستنې ته به ورسپارل شي. د کانال د جوړېدو ترڅنګ ۱۰ کسانو ته په فني او ۵۰ کسانو ته په غیرفني ډول د کار زمینه هم برابره شوې ده.
په ورته وخت کې، د سپین بولدک ولسوالی سیمه ییز اوسېدونکي د کرنې ریاست او ملګرو ملتونو د پرمختیایي پروګرام «یو،ان،ډي،پي» ادارې څخه خوښي څرګنده کړه، چې د اوبو رسولو په موخه ورته اسانتیاوې برابرېږي.
د یادونې وړ ده، چې یوه میاشت وړاندې هم د کندهار د کرنې ریاست په هڅو او د ملګروملتونو پراختیایي ادارې په مالي ملاتړ، د ژړۍ ولسوالی مهاجرینو سیمه کې د ۱۸۵ زره امریکایې ډالرو په ارزښت د اوبو رسولو کانالونو د جوړېدو چارې پیل شوې وې.