هلمند کې له بزګرانو د مازادو غنمو پیرلو په موخه د ګڼو بنسټونو چاروکو سره ناسته وشوه

د هلمند ولایت د کرنې، اوبولګولو او مالدارۍ رییس الحاج مولوي نیازمحمد وهاج په داسې حال کې، چې د همدې ریاست د کرنیزو چارو آمر احمد محب او د طبعي سرچینو آمر قاري مولوي دین محمد مغفور هم شتون درلود دکوپراتیفونو، کرنیزو شرکتونو، علافانو او بزګرانو سره ناسته وکړه. 
په دغه ناسته کې دهلمند د کرنې رییس وویل، چې هلمند کې مو د غنمو د پیرودلو سهم پوره شوی دی خو مرکز کابل ته یې د مازادو غنمو د انتقال په اړه ګډونوالو څخه غوښتنه وکړه، ترڅو هغه مقدار غنم چې د هلمند لپاره یې سهمیه تعین شوې ده کابل ته باید په معین وخت کې د طرزالعمل مطابق ولیږدول شي.
دهلمند دکرنې رییس راغلو ګډونوالو ته وویل، چې غنم مو د ځانګړې کمیټې لخوا په همدې ولایت کې له نږدې لیدل کیږي، هغه غنم چې پاک، د کړنلارې مطابق او د انتقال وړ وي درته په نښه کېږي او بیا کابل ته لېږلو ته اجازه درکول کېږي، ترڅو له یوې خوا مو غنم له مستردیدو څخه وژغورل شي او له بلې خوا درته مالي زیان ونه رسېږي.
د غونډې ګډونوالو په پیل کې په ازاد بازار کې د غنمو د بیې د لوړېدو خبره وکړه او وې ویل، چې دامهال د هلمند ازاد بازار لوړ دی خو بیا هم هڅه کوو ترڅو دغه سهم پوره کړو او مرکز ته یې ولیږدوو.