د شمالي ولايتونو د څړځايونو د تشخيص او تثبيت لپاره د ټيمونو د استولو په پار غونډه دائره شوه
۲۳ لړم ۱۴۰۳ه.ش
۱۱ جُمَادَى الأول ۱۴۴۶ه.ق
د کرنې، اوبولګولو او مالدارۍ وزارت د اراضۍ لوی رياست په مقام کې د ځمکو چارو لوی رییس مولوي محمود مظلوم، د کرنې وزارت د طبیعي سرچینو لوی رییس مولوي عبدالاحد خلیل، د ارزونې، استملاک او بیا مېشتېدنې رییس مولوي حضرت محمد طيب، د څړځايونو رییس سيد خالد صاحب زاده او د اراضۍ ادارې يو شمېر سلاکارانو په کډون دهېواد په کچه د شمالي ولایتونو د څړځایونو د تشخیص او تثبیت په پار د ټیمونو استولو په پار غونډه دائره شوه.
په پیل کې د کرنې وزارت د اراضۍ لوی رییس مولوي محمود مظلوم د هېواد شمالي ولايتونو ته د څړځايونو د تشخيص او تثبيت په موخه د ټيمونو د استولو په اړه خبرې وکړې او ټولو مسؤلينو ته يې لارښوونه وکړه، چې د دغه کار د پلي کولو په پار بايد چې ټيمونه ژر تر ژره دغه ولايتونو ته سفر وکړي.
ښاغلي مظلوم وويل: «د دغې پروسې د ښه پلي کېدو لپاره هر څومره تخنيکي وسايل لکه کمپیوټر، پرنټر او داسې نورو تجهيزاتو ته اړتیا وي مخکې له سفر څخه دې موضوع د اراضۍ لوی رياست سره شريک شي تر څو دا ټول امکانات د ټيمونو لپاره برابر شي.»
ورپسې د کرنې وزارت د طبیعي سرچینو لوی رییس مولوي عبدالاحد خلیل هم د اراضۍ لوی رییس د خبرو په تاييد د يادې موضوع په تړاو خبرې وکړې او په دغه برخه کې له مسؤلينو سره خپل نظر شریک کړ.
د يادونې ده، چې دغه ملي پروسه فاریاب ولایت کې په بشپړه توګه سرته رسېدلې او دا لړی به په پيل کې د هېواد شمالي ولايتونه او وروسته به ټولو ولایتونو کې تطبيق شي.
ورپسې د اراضۍ لوی رياست د ارزونې، استملاک او بیا مېشتېدنې رییس مولوي حضرت محمد طيب، د کرنې وزارت د څړځايونو رییس سيد خالد صاحب زاده او د اراضۍ لوی رياست حقوقي او تخنيکي برخې سلاکارانو په خپل وار د دغه پروګرام د ښه تطبيق او همدارنګه په فارياب ولايت کې د يادې پروسې د پايلې په هکله هم خبرې وکړې.
په پای کې د اراضۍ لوی رییس مولوي محمود مظلوم د تخنيکي وسايلو ترڅنګ يې د ټيمونو لپاره د نقليه وسایطو او همدارنګه د هغو لپاره د اوسېدلو د ځای د برابرولو په برخه کې هم د همکارۍ ژمنه وکړه او له ټولو مسؤلينو څخه يې وغوښتل، چې د ټيمونو د استولو څخه مخکې که اړتيا ليدل کيږی یاده پروسه کې ښکېل ټولو کارکوونکو ته د سمينار په ورکولو سره د هغو د تجربو د لوړلو په برخه کې هم هڅې وشي.
