د للندر د اوبو بند د استملاکي چارو د چټکتیا په موخه غونډه ترسره شوه
۴ مرغومې ۱۴۰۴ه.ش
۴ رَجَب المُرَجَّب ۱۴۴۷ه.ق
د للندر د اوبو بند پروژې د استملاکي چارو د چټکتیا په موخه د اوبو او انرژۍ وزارت د انجینري تاسیساتو لوی ریاست په مقام کې غونډه ترسره شوه.
په یاده غونډه کې د ارزونې، استملاک او بیامېشتدنې رییس مولوي سیفالله الیاس، د انجینري تاسیساتو عمومي رییس انجنیر عبدالغفور عمري، د کابل ولایت د سیندیزې حوزې عمومي رییس مولوي احسانالله حقیار، او د ارزونې، استملاک او بیامېشتدنې ریاست یو شمېر آمرینو ګډون درلود.
د غونډې په پیل کې د انجینري تاسیساتو عمومي رییس د للندر د اوبو بند پروژې د اهمیت او ارزښت په اړه هر اړخیز معلومات وړاندې کړل. وروسته د ارزونې، استملاک او بیامېشتدنې رییس د یادې پروژې د ترسره شویو استملاکي چارو په اړه تفصیلي معلومات شریک کړل.
نوموړي ډاډ ورکړ چې د للندر د اوبو بند پروژې استملاکي چارې د اصولو او مقرراتو سره سم په چټکۍ روانې دي، او هڅه کېږي چې دغه چارې په لنډ وخت کې بشپړې شي، تر څو د پروژې د عملي پیل لپاره لازم شرایط برابر شي.
په یاده غونډه کې د یو باصلاحیته کمېټې د جوړولو پرېکړه هم وشوه، چې د کابل والي او د اړوندو وزارتونو مرستيالان به یې غړي وي، تر څو ټاکل شوې چارې په قانوني، منظم او اغېزمن ډول پر مخ ولاړې شې، او همدارنګه د پروژې لپاره د معرفي شویو استملاکي ټیمونو د شته ستونزو او هغو ننګونو په اړه هر اړخیز بحث وشو چې استملاکي ټیمونه د ساحوي چارو پر مهال ورسره مخ دي، او د حل لارې یې وڅېړل شوې.
په پای کې، دواړو لورو د کارونو د لا ښه تنظیم، همغږۍ او مؤثر تطبیق په موخه یو بل ته د بشپړې همکارۍ ډاډ ورکړ، او غونډه د اختتامیه دعا په کولو سره پای ته ورسېده.
