کونړ کې د ځنګلونو د بیارغونې او پراختیا په پار هڅې چټکي شوي
د کونړ ولایت د کرنې، اوبولګولو او مالدارۍ ریاست له خوا په یاد ولایت کې د ځنګلونو د بیارغونې او پراختیا په پار هڅې چټکې شوي دي.
د کونړ د کرنې ریاست چارواکي وایي، چې ددې ولایت د ځنګلونو د بیارغونې،پراختیا ، خوندیتوب او ترڅنګ یې د ابرېزو او د نیالګیو د تولید او وېشلو برخه کې ګڼ پراګرامونه پلي کړي دي، چې د هغو له ډلې یې منډه کول او سالار باغ قوریو کې چې ۱۰۶زره نیالګي وېش ته چمتو شوې وه، ۹۶زره نیالګي یې پر ملکي او نظامي ادارو، ټولنو او د ځنګلولی پر کمېټو وېشل شوي دي.
دغه راز په ورته وخت کې د یاد ولایت په مرکز او ولسوالیو کې د ۱۷زره او ۱۷۰ چهارمغز نیالګیو اېښودنه، د اوبو کوچني حوضونه او چکډمونه جوړول، د توافقي او تکثیري قطعاتو اېښودل، د ځنګلولی ۶۴ټولنو ته د جوازلیکونو ورکړه، خلکو ته عامه پوهاوی او ګڼې نورې چارې هغه څه دي، د یاد ولایت د کرنې ریاست له خوا ددې ولایت د ځنکلونو د بیارغونې او پراختیا په پار ۱۳۹۹یم کال کې تر سره شوي دي.
د کونړ د کرنې، ریاست له خوا د دې ولایت د ځنګلونو، څړځایونو او طبیعي سرچینو د ساتنې، رغونې او پراختیا په موخه هڅې کړندي شوي تر څو یادې برخې ته لا پراختیا وکړي.
د کونړ دکرنې ریاست د سیمې اوسیدنکي، بزګران، مالداران او کوچیان هڅوي ترڅو پخپلو سیمو کې د طبعي ځنګلونو، څړځایو او دولتي ملکیتونو ساتنه وکړي او دغو سرچینو څخه په قانوني توګه ګټه پورته کړي.
