کندهار کې د څارویو سرشمېرنې په اړه د د ملګرو ملتونو د خوړو او کرنې ادارې سره ناسته وشوه
۱۲ لېندۍ ۱۴۰۳ه.ش
۱ جُمَادَى الثاني۱۴۴۶ه.ق
د کندهار د کرنې، اوبو لګولو او مالدارۍ ریاست د مالدارۍ آمریت سرپرست مولوي عبدالغني عفان په مشرۍ د ملګرو ملتونو د خوړو او کرنې ادارې (ایف اې او) استازو سره د څارویو سرشمېرنې او اړوندې همغږۍ په موخه ګډه ناسته ترسره شوه.
په دې ناسته کې د مالدارۍ آمریت مسؤلینو او د ملګرو ملتونو د خوړو او کرنې ادارې استازو ګډون درلود. د ناستې پر مهال د ملګرو ملتونو د خوړو او کرنې ادارې مسؤلینو د څارویو سرشمېرنې، واکسین تطبیق، او نورو اړوندو برخو کې د کندهار کرنې ریاست له لوري د شوو همکاریو څخه مننه وکړه او هیله یې وښوده چې دغه همکارۍ به په راتلونکي کې هم دوام ومومي.
د ملګرو ملتونو د خوړو او کرنې ادارې استازو د څارویو د سرشمېرنې او واکسین کمپاینونو په اغېزمن تطبیق کې د لا زیاتو همکاریو غوښتنه وکړه. چې د مالدارۍ آمریت سرپرست مولوي عبدالغني عفان د څارویو سرشمېرنې او واکسین پروسو د بریالي تطبیق ډاډ ورکړ. نوموړي د مالدارانو لپاره په واکسین او نورو برخو کې د لا زیاتو مرستو غوښتنه وکړه، څو د مالدارۍ سکتور وده وکړي او د مالدارانو اقتصادي حالت ښه شي.
یاده ناسته د دواړو لوریو ترمنځ د اړینو پرېکړو او سپارښتنو په شریکولو سره پای ته ورسېده. تمه ده چې په راتلونکو پروژو کې د مالدارانو اړتیاوې لا زیاتې پوره شي.
