پکتیکا کې د اصلاح شویو غنمو ننداریزې کروندې جوړېږي
٢۱ لړم ۱۴۰۲ه.ش
٢۸ ربیعالثاني ۱۴۴۵ ه.ق
د پکتیکا دکرنې، اوبولګولو او مالدارۍ ریاست ددې ولایت له ۲۰ تنه کروندګرو سره د ننداریز کروندو جوړولو په موخه د غنمو اصلاح شویو تخمونو او کیمیاوی سرو مرسته وکړه.
د پکتیکا دکرنې، اوبولګولو او مالدارۍ رییس مولوی شېر محمد ذبیح وایي، چې د ننداریزو کروندو په جوړولو سره کروندګر کولاي شي، چې خپلې تجربې یو له بل سره شریکې کړي.
هغه زیاته کړه، چې د کتار په بڼه د اصلاح شویو تخمونو کرکېله کولاي شي، چې د بزګرانو په حاصلاتو کې د پام وړ زیاتوالی راولي.د کتار په بڼه کرکېله کې د ناروغیو مخنیوی او د هرزه بوټو کنټرول په اسانې سره کېږي.
ددغو ننداریزو کروندو دجوړولو موخه نوي او میکانزه کرکیلې سره د بزګرانو بلدتیا او د دوی د کرنیزو حاصلاتو زیاتولو ته زمینه برابرول دي.
