پکتیا کې پر یوشمېر بزګرانو د لوبیا تخم او کرنیز توکي ووېشل شول

۹ غویی ۱۴۰۰
د پکتیا د کرنې، اوبولګولو او مالدارۍ ریاست د ژغورنې نړیوالې کمیتې په همکارۍ ددې ولایت د احمدابا او سیدکرم ولسوالیو په ۴۹ بزګرانو د لوبیا تخم او د کرکېلي اړین توکي وېشلي دي.
د پکتیا د کرنې ریاست چارواکي وايي، چې ددغو ۴۹ برخمن شویو بزګرانو له ډلې ۲۵ یې د احمدابا او ۲۴ یې د سیدکرم ولسوالۍ دي، چې هر بزګرته د لوبیا ۵۵ کیلو تخم، يوه دانه کراچۍ، يو درمل شېندونکی، يوه جوړه دستکش، آب پاش، بيل، لوور او نور بېلابېل کرنيز توکي ورکړل شوي دي او په راتلونکې کې به دوی ته توره او سپينه سره هم ورکړل شي.
د یادو توکو د وېش موخه د کرنې پر مټ د اړمنو کورنيو د اقتصادي وضعيت ښه والی او د بزګرانو اقتصادي ودې ته زمینه برابرول دي.