پکتیا کې د زردالوو حاصلات ډېر شوي
۲۶ چنګاښ ۱۳۹۸
د پکتیا د کرنې، اوبولګولو او مالدارۍ ریاست چارواکي وایي، چې سږ کال په دې ولایت کې د زردالو بڼونه ښه وده کړې او د بزګرانو د عوایدو په ښه سرچینه بدله شوې ده. د دغو چارواکو په خبره د کرنې، اوبولګولو او مالدارۍ وزارت د بڼوالۍ او مالدارۍ ملي برنامې له خوا په ۱۳۹۲ یم کال کې د پکتیا په خطابه کلی کې د امیري زردالو ۱۳ جریبه بڼ جوړه شوې، چې اوس په حاصل راغلي دي او حاصل یې کابو ۳۰ زره کیلو ته رسیږي.
د چارواکو په خبره بڼوالو او بزګرانو سره د کرنې وزارت مرستې او ملاتړ ددې سبب شوي دي چې، په دې ولایت کې د نورو مېوو ترڅنګ د زردالو حاصلات هم ډېرشي.
د پکتیا د کرنې ریاست چارواکي وایي دوی هلې ځلې کوی، چې په دې ولایت کې د بڼوالۍ لمن پراخ او د بېلابېلو مېوو نوی بڼونه جوړ کړي.
