پکتیا: د ځنګلونو د قطع مخنيوي کميټې د مرکز ګرديز اړوند لرګيو هډې له لرګي پلورونکو سره ناسته ترسره کړه
۲۶ لېندۍ ۱۴۰۱ه.ش
۲۳ جمادي اﻷول ۱۴۴۴ ه.ق
د پکتیا ولایت د کرنې، اوبولګولو او مالدارۍ رياست اړوند د ځنګلونو او طبيعي سرچينو آمريت د ځنګلونو د قطع مخنيوي کميټې غړو د مرکز ګرديز اړوند لرګيو هډې له لرګي پلورونکو سره د ځنګلونو د قطع مخنيوي په موخه د دی ریاست د غونډو په تالار کې ناسته ترسره کړه.
په ياده ناسته کې ګډونوالو ته د ځنګلونو د ګټو او اهميت په اړه د عامه پوهاوي ترڅنګ د ځنګلونو د قطع مخنيوي په برخه کې د امير المومنين حفظ الله فرمان او د وزیرانو شورا پریکړه هم دوی ته وړاندې شو، په ناسته کې له لرګي پلورونکو وغوښتل شول، چې د لمدو لرګيو له پېر او پلور څخه په کلکه ډډه وکړي او د چهارتراشو لرګیو مالیه به د طرحې مطابق ترې اخیستل کېږي.
د پکتیا د کرنې، اوبولګولو او مالدارۍ ریاست د طبیعي سرچینو آمر زاهب الله ارسلا په خپلو خبرو کې وويل، چې د ځنګلونو ساتنه د کرنې رياست له لومړيتوبونو څخه ده او چا ته اجازه نه ورکوي چې ددې ولايت ځنګلونه تخريب او له منځه یوسي، نوموړي لرګي پلورونکو ته په ټينګار سره وويل، چې هر څوک د لمدو لرګيو په پېر، پلور او قاچاق کې ونيول شول د قانون منګولو ته به وسپارل شي.
