په ۱۴۰۴ کال کې د هېواد په کچه د شولو د کرکیلې سیمه او د وريجو تولید زیات شوی

۱ مرغومې ۱۴۰۴ه‍.ش
۱ رَجَب المُرَجَّب ۱۴۴۷ه‍.ق
د کرنې، اوبولګولو او مالدارۍ وزارت د کرنیزې احصایې او معلوماتو ریاست د راپور له مخې، په ۱۴۰۴ کال کې د هېواد په کچه د شولو د کرکېلې سیمه او د وريجو د تولید کچه لوړه شوې ده.
د راپور د شمېرو له مخې، په ۱۴۰۴ کال کې د هېواد په ۱۸ ولایتونو کې شولې کرل شوې دي او د کرنې لاندې ټولیزه ساحه یې شاوخوا ۱۳۵ زره هکتارو ته رسېدلې ده. دا په داسې حال کې ده، چې په ۱۴۰۳ کال کې د شولو تر کرنې لاندې سیمه شاوخوا ۱۲۹ زره هکتاره وه، چې دا په روان کال کې  نږدې ۴٫۶ سلنه زیاتوالی ښيي.
همدارنګه، په ۱۴۰۴ کال کې د وريجو ټولیز تولید شاوخوا ۴۴۷ زره متریک ټنه اټکل شوی، په داسې حال کې چې دا کچه په ۱۴۰۳ کال کې نږدې ۴۳۸ زره متریک ټنه وه. په دې سره، په روان کال کې د وريجو تولید د تېر کال په پرتله نږدې ۲ سلنه زیاتوالی ښيي.
د راپور پر بنسټ، کندز او تخار ولایتونه د هېواد د وريجو په تولید کې تر ټولو زیاته ونډه لري، په داسې حال کې چې غور او سرپل ولایتونو کې د تولید کچه تر ټولو کمه ثبت شوې ده. په هغو ولایتونو کې چې د دایمي او کافي اوبو له سرچینو برخمن دي، د وريجو تولید زیات شوی؛ خو په یو شمېر نورو ولایتونو کې د اوبو د کمښت او د وچکالۍ د اغېزو له امله د تولید کموالی لیدل شوی دی.
په راپور کې دا هم راغلي، چې شوله په افغانستان کې تر ډېره په دوو طریقو، یعنې د نیالګي کېنولو او پاشان په ډول کرل کېږي او د بزګرانو ډېره برخه له سیمه ییزو تخمونو څخه ګټه اخلي.
د کرنې، اوبولګولو او مالدارۍ وزارت ټینګار کوي، چې د شولو د تولید زیاتوالي، د وريجو په وارداتو د هېواد د اتکا د کمولو او د بزګرانو د معیشت د ښه والي په موخه، د اصلاح شوو تخمونو د کارونې پراختیا، د اوبو د سرچینو اغېزمن مدیریت او د بزګرانو لپاره د تخنیکي او حمایوي خدمتونو پیاوړتیا د دې وزارت له اساسي لومړیتوبونو څخه دي.