هلمند کې لسګونو بزګرانو ته د غنمو د پېرلو کړنلاره تشریح شوه
١٥ تله ۱۴۰۳ه.ش
٣ رَبِیعُ الْثاني ۱۴۴۶ه.ق
د هلمند ولایت د کرنې، اوبولګولو او مالدارۍ ریاست له خوا لسګونو بزګرانو ته په لښکرګاه کې د غنمو د پیرلو شرطونه او کړنلاره تشریح شوه.
په دې غونډه کې د کرنې رییس الحاج مولوي نیازمحمد وهاج، د کرنې وزارت استازي انجنیر غلام فارم، د ولایت مقام استازي مفتي روحاني، د لښکرګاه ښاروالۍ استازي نعمت الله وفا او د صنعت او سوداګرۍ ریاست استازي عبدالحی مطمئن ګډون درلود.
د غونډې په پیل کې د کرنې رییس وهاج په خپله وینا کې وویل چې د غنمو د پېرلو لومړی حق د بزګرانو دی او د دې لپاره چې واقعي بزګران وپېژندل شي، د اړوندو ولسوالیو د کرنې مسوولین به د بزګرانو تایید ترسره کوي. همدارنګه یې د پروسې په روڼتیا ټینګار وکړ.
ورپسې د کرنې وزارت، ولایت مقام، ښاروالۍ او سوداګرۍ ریاستونو استازو په خپل وار د غنمو د پېرلو شرایط او اړوند نور موارد په تفصیل سره بزګرانو ته بیان کړل. د غونډې په پای کې د بزګرانو پوښتنو ته د ګډې کمېټې استازو ځوابونه ورکړل.
د یادولوړ ده، چې د عالیقدر امیرالمؤمنین په ځانګړي حکم به هلمند کې (٥٥١٠) مټریک ټنه غنم له بزګرانو څخه پېرل کېږي، چې اداري چارې یې بشپړې شوي او ژر به د ګډې کمېټې لخوا عملي شي.
