هلمند کې د ٨ کیلو متره فرعي کانالونو د پاکولو چارې بشپړ او ګټې اخیستنې ته وسپارل شول
۱۶ چنګاښ ۱۴۰۱ ه.ش
۸ ذوالحجَّة ۱۴۴۳ ه.ق
دهلمند دکرنې، اوبولګولو او مالدارۍ ریاست وایي، چې ددې ولایت د موسی کلا ولسوالی د ګڼو ولسونو په غوښتنه، د کرنې ریاست په هلو ځلو د کچ سردار او کاڼي مانده او د شاجوئ یا توغي فرعي کانالونه چې شاخوا ٣٨٣ هکټار کرنیزه ځمکه خړوبوي په اساسي ډول پاکاري او ګټې اخستنې ته وسپارل شول.
په دې پروسه کې نږدې ١٧٠ تنو ځايي اوسیدونکو کار کاوه چې هر نفر ته په ورځنۍ ډول د کار په مقابل کې نغدې پیسې ورکول کیدلې.
ددې پروسې مالي چارې د ژغورنې نړیوالې کمېټې یا (IRC) په همکارۍ تمویل شوي دي چې، دکرنې ریاست ترڅنګ د سیمې د مسؤلو ادارو سره په پوره همغږۍ سرته ورسیدلې.
د سیمې ځايي بزګر او اوسېدونکي ددې کانالونو له پاکولو خوښي ښئي او زیاتوي چې ددې فرعي کانالونو په صفا کېدو سره یې د شنو فصلونو، بڼونو او همدارنګه د کورنیو د اړتیا وړ اوبو هغه ستونزې حل شوي دي، چې له کلونو کلونو ورسره مخ وو.
د هلمند ولایت د کرنې ریاست هڅه کوي تر څو په کروندو کې د اوبو ښه مدیریت په موخه د کرونده ګرو ستونزې تشخیص او د حل په برخه کې یې اقدامات ترسره کړي، ترڅو د بزګرو د حاصلاتو په لوړېدو کي د پام وړ بهبود رامنځته شي.
