ننګرهار کې په یو شمېر بڼوالو د بڼوالۍ اړونده توکي ووېشل شوې
۹ تله ۱۳۹۹
د ننګرهار د کرنې، اوبولګولو او مالدارۍ ریاست له خوا ددې ولایت د کوټ، رودات، اچین، چپرهار، شېرزاد او خوګیاڼو ولسوالیو په ۶۴۰ بڼوالو د بڼوالۍ اړونده توکي وېشل شوي دي.
دغه توکي، د کرنې وزارت د کرنې د ودې او کلیوالي پراختیا پروژې « CBARD» په همکارۍ په هغو بڼوالو وېشل شوي دي، چې دیادې پروژې له خوا ورته د مېوو بڼونه هم جوړ شوي دي.
د ننګرهار د کرنې ریاست چارواکي وایي، چې په دغو وېشل شویو توکو کې د دوا شیندنې « PRR»پمپ، د ښاخبری لوی او واړه قیچې، د ښاخبری اره، عینکې، دستکشې، موزې، د حاصلاتو راټولولو توکي او یوشمېر نور اړین توکي شامل دي، چې د عصري بڼوالۍ د ترویج په موخه پر بڼوالو وېشل شوي دي.
ددغو مرستو د وېش موخه د بڼوالو ملاتړ او اقتصادي پیاوړتیا، د لوړ ارزښت لرونکو کرنیزو توکو دودول او په دې ولایت کې د بڼوالۍ د محصولاتو معیاري کول دي.
د ننګرهار دکرنې ریاست هلې ځلې کوی، چې د بڼوالۍ د عصري توکو په وېش او روزنیزو پروګرامونو سره د بڼوالو وړتیا لوړ او د دوی د بڼونو محصولات ډېر او ښه کړي، چې هم د بڼوالو عواید زیات شي هم بزګران مشروع کرکېلي ته مخه کړي.
له دغو توکو څخه برخمن شوي بڼوال د کرنې وزارت له هلوځلو څخه د منني ترڅنګ ژمنه وکړه، چې د بڼوالۍ د حاصلاتو د زیاتوالي په پار هلې ځلې کوي.
