۱۶ تله ۱۳۹۹

د کرنې، اوبولګولو او مالدارۍ وزارت په هېواد کې د چرګانو د روزنې د ودې او د بېوزله کورنیو د اقتصادۍ ودې په پار داځل د لغمان په ولایت کې ۱۴۴ بېوزله کورنیو ته د چرګانو واړه کورني فارمونه جوړ او پر دغو کورنیو د چرګانو روزنې اړونده توکي وېشلي دي.

د لغمان ولایت د کرنې، اوبولګولو او مالدارۍ ریاست وایي: «د لغمان دکرنې ریاست د کورني اقتصاد مدیریت له لارې ددې ولایت ۱۴۴ بېوزله کورنیو ته د چرګانو ترڅنګ د چرګانو روزنې اړونده توکي او خوراکي توکي ورکړل شوي دي.»

د لغمان د کرنې، اوبولګولو او مالدارۍ ریاست چارواکي وايي، چې ددغو ۱۴۴ بېوزله کورنیو د اقتصادي پیاوړتیا په پار پر هرې کورنۍ ۲۰ چرګان، د چرګانو خوراکي توکي او د چرګانو د روزنې اړوند نور اړین توکي وېشل شوي دي.

د لغمان د کرنې ریاست د چارواکو په خبره ددې مرستې موخه د چرګانو د روزنې صنعت ته پراختیا ورکول او مېرمنو ته په کور د ننه د کار زمینه برابرول او د دوی اقتصادي پیاوړتیا ده.

ددې برنامې برخمن شوي کورنۍ له دې برنامې څخه د مننې او خوښۍ ترڅنګ وویل چې، د چرګانو روزنه د دوی د کورنیو په اقتصادي وده کې له دوی سره مرسته کوي.

د لغمان د کرنې ریاست وایي، چې له دې برنامې څخه برخمن شوي کورنیو لپاره د چرګانو د روزنې په برخه کې روزنیز پروګرامونه هم په پآم کې نیول شوي دي.