لغمان کې یوشمېر بزګران وروزل شول
۲۷ کب ۱۴۰۱ه.ش
۲۵ شَعبان المُعَظّم ۱۴۴۴ ه.ق
د لغمان دکرنې، اوبولګولو او مالدارۍ ریاست د ملګرو ملتونو پراختیایي ادارې (UNDP) په مالي او د «Roots of Peace» په تخنیکي همکارۍ ددې ولایت د مرکز مهترلام ۳۴ مخکښو بزګرانو ته د نباتي ناروغیو او افتونو د کنټرول په برخه کې دوه ورځنۍ روزنیز پروګرام دائره کړې وه.
په دې اړه جوړه شوې غونډه کې د لغمان دکرنې، اوبولګولو او مالدارۍ رییس الحاج مولوی محمدولي محسن وویل، چې کرکېله او د نیالګیو روزل دنیوي او اخروي ارزښت لري ښآغلي محسن بزګرانو ته په خطاب کې وویل: «تاسو بهترین خلک یی چې نورو وګړو ته ګټه رسوۍ او ستاسې له حاصلاتو انسانان،حیوانات اوپرندګان تغذیه کوي، چې دا کار جاریه صدقه ده.»
د لغمان دکرنې رییس پر ټولو کروندګرو غږ وکړ چې خپلو ځمکو او بڼونو کې زحمت وباسي او له دې لارې د هېواد دپرمختګ لپاره خپلې هڅې لا پسې ګړندۍ کړي.
