د کندز دشت ارچي کې پر سلګونو بزګرانو د غنمو اصلاحشوي تخم او کیمیاوي سرې ووېشل شوې
۱ لیندۍ ۱۴۰۴ هـ.ش
۱ جُمَادَى الثاني ۱۴۴۷ هـ.ق
د بزګرانو د ملاتړ او د غنمو د حاصلاتو د لوړولو په موخه، د کندز ولایت د دشت ارچي ولسوالی پر ۵۰۰ بزګرانو د غنمو اصلاحشوي تخمونه او کمکي کیمیاوي سرې د دې ولسوالی ولسوال مولوي عبدالوکيل انصاري، د دشت ارچي ولسوالی د کرنیزو خدماتو عمومي مدیر، او یوشمېر نورو سیمه ییزو چارواکو په حضور کې ووېشل شول.
دغه مرسته د ملګرو ملتونو د خواړو او کرنې نړۍوالې ادارې «اف.اې.او» په مالي او د کلیو د بیارغونې دفتر په تخنیکي همکارۍ د کندز ولایت د کرنې، اوبولګولو او مالدارۍ ریاست په همغږۍ پر دغو بزګرانو وېشل شوي دي.
ددې پروګرام په ترڅ کې هر بزګرته ۵۰ کیلو ګرامه د غنمو اصلاحشوی تخم، ۵۰ کیلوګرامه کیمیاوي یوریا سره او ۵۰ کیلوګرامه توره سره ورکړل شوي دي.
د دې مرستو موخه د کرنیزو تولیداتو پیاوړتیا، د خوړو خوندیتوب رامنځته کول او د بزګرانو اقتصادي پیاوړتیا ده. همدارنګه هڅې روانې دي، چې په نورو ولسوالیو کې هم د اصلاحشوو تخمونو او کیمیاوي سرو د وېش لړۍ پراخه شي.
د دشت ارچي بزګران له دغو مرستو هرکلی کوي او دا یې د غنمو په کر کې د ښه والي او د تولید لګښتونو په کمولو کې ګټورې بللې دي.
