د کندز دشت ارچي ولسوالی کې د پستې ځنګلونو د تخریب مخه ونیول شوه
۱۱ وری ۱۴۰۵ه.ش
۱۳ شَوّالُ المُکَرَّم ۱۴۴۷ه.ق
د قدرتي سرچینو د ساتنې او د ځنګلونو د تخریب د مخنیوي په موخه د دشت ارچي ولسوالی د کرنیزو خدمتونو مدیریت کارکوونکو د شنې قطعې سره په همغږۍ د پستې د ځنګلونو په سیمو کې د غیرقانوني زرشویۍ (د سرو زرو مینځلو) فعالیتونو مخه نیولې ده.
د معلوماتو له مخې، یو شمېر کسان په غیرقانوني ډول د پستې د ځنګلونو په سیمو کې په زرشویۍ بوخت وو، چې د کرنیزو خدمتونو مدیریت کارکوونکو له خوا له سیمې څخه وشړل شول. همدارنګه، د سرو زرو د استخراج کارګرانو، شپنو او څارویو د حضور څخه چې د ځنګلونو د تخریب لامل کېدل، مخنیوی وشو.
د یادونې وړ ده، چې دغه اقدامات د نافذه قوانینو د تطبیق او د ځنګلونو او قدرتي سرچینو د ساتنې په موخه ترسره شوي، او په دې برخه کې د هر ډول غیرقانوني فعالیتونو د مخنیوي هڅې دوام لري.
د پستې ځنګلونه د هېواد له مهمو قدرتي شتمنیو څخه شمېرل کېږي، چې د چاپېریال ساتنې، د خاورې د فرسایش د مخنیوي او د خلکو د اقتصادي وضعیت په ښه والي کې حیاتي رول لري. له همدې امله، د دغو ارزښتناکو سرچینو ساتنه او پالنه د دې ادارې له اساسي لومړیتوبونو څخه ده.
په همدې حال کې، د کندز دکرنې ریاست له ځایي اوسېدونکو څخه غوښتنه کوي، چې د ځنګلونو په ساتنه او پالنه کې همکاري وکړي او له هر ډول غیرقانوني کړنو څخه چې د دغو سرچینو د تخریب لامل ګرځي، ډډه وکړي.
