د کرنې وزارت مالي او اداري مرستیال د فاریاب د کرنې ریاست څخه لیدنه وکړه

٢١ زمری ۱۴۰۵ هـ.ش
٢٨ صَفَر المُظَفَّر ۱۴۴۸ هـ.ق
 د کرنې، اوبولګولو او مالدارۍ وزارت مالي او اداري مرستیال، مولوي نورالدین عمیر، فاریاب ولایت ته د خپل رسمي سفر په ترڅ کې د دغه ولایت د کرنې، اوبولګولو او مالدارۍ له ریاست څخه لیدنه وکړه او د یاد ریاست له چارواکو او کارکوونکو سره یې وکتل. 
په دې لیدنه کې د فاریاب د کرنې ریاست کاري وضعیت او فعالیتونه و ارزول شول او د مالي او اداري چارو د ښه والي، تدارکاتو، عشر او زکات، مخابراتي انتنونو د تثبیت او ارزونې، ځمکنیو چارو او نورو اړوندو برخو په اړه خبرې وشوې.          د کرنې وزارت مالي او اداري مرستیال د چارواکو د راپور له اورېدو وروسته، د شفافیت پر تأمین، د اداري او مالي چارو پر لا ښه تنظیم، د کارکوونکو او مراجعینو د ستونزو پر حل، د بېلابېلو برخو ترمنځ د لا زیاتې همغږۍ پر پیاوړتیا او د اصولو او مقرراتو مطابق د چارو پر ترسره کولو ټینګار وکړ. نوموړي همدارنګه د کاري بهیر د ښه والي په موخه لازمې لارښوونې وکړې او له چارواکو او کارکوونکو څخه یې وغوښتل، چې د مسؤولیت‌پالنې او لا ډېرو هڅو له لارې هېوادوالو ته اغېزمن او باکیفیته خدمتونه وړاندې کړي.                                        د فاریاب د کرنې ریاست چارواکو هم د وزارت د پروګرامونو د پلي کولو او د کرنې، اوبولګولو او مالدارۍ په برخو کې د خدمتونو د ښه والي لپاره پر خپلو هڅو د دوام ټینګار وکړ.