د کرنې وزارت د پلان او پالیسۍ رییس د ملګرو ملتونو د پراختیايي پروګرام له چارواکو سره وکتل
۴ مرغومې ۱۴۰۴ه.ش
۴ رَجَب المُرَجَّب ۱۴۴۷ه.ق
د کرنې، اوبو لګولو او مالدارۍ وزارت د پلان او پالیسۍ رییس سید احمد خالد صاحبزاده، د کرنې او مالدارۍ معینیت او همدارنګه د اوبو لګولو او قدرتي سرچینو د معینیت له یو شمېر سلاکارانو سره یو ځای، د ملګرو ملتونو د پراختیايي پروګرام «یو.ان.ډي.پي» د پراختیايي برخې له مسوولینو سره تخنیکي ناسته ترسره کړه.
یاده ناسته د هغو پروژو د ارزونې او همغږۍ په موخه ترسره شوه، چې ټاکل شوې د بلخ او نیمروز ولایتونو کې تطبیق شي. د کرنې وزارت د پلان او پالیسۍ رییس د ملګرو ملتونو د پراختیايي پروګرام «یو.ان.ډي.پي» له هڅو مننه وکړه او د کرنیز سکتور د پراختیا په موخه یې د دواړو لورو ترمنځ د لا زیاتو تخنیکي ناستو پر ترسره کېدو ټینګار وکړ.
همدارنګه، په دې ناسته کې د ملګرو ملتونو مسوولینو ژمنه وکړه، چې شاوخوا ۱.۲ میلیونه امریکایي ډالر به د کرنې وزارت د لومړیتوبونو له مخې په ۲۰۲۶ میلادي کال کې د بېلابېلو پروژو د تطبیق لپاره ځانګړي کړي. دواړو لورو ژمنه وکړه، چې د پروژو د پلي کېدو په برخه کې به په ګډه او همغږۍ سره کار کوي، او د کرنې وزارت هم ټینګار وکړ، چې د هر ډول همکارۍ ملاتړ ته چمتو دی.
