د کرنې وزارت د ستراتیژیکو زېرمو رئیس په لښکرګاه کې د غنمو د تخلیې لړۍ څخه څارنه وکړه

د کرنې، اوبولګولو او مالدارۍ وزارت د ستراتیژیکو زېرمو رئیس مولوي قدرت الله حقیار په لښکرګاه کې د بزګرانو د اضافي غنمو پېرودلو د تخلیې له لړۍ څخه لیدنه وکړه. 
د دې لیدنې پر مهال د معاینې او پېرودلو پلاوي هم شتون درلود، چې په ترکیب کې یې د ولایت مقام استازي مفتي محمد نسیم روحاني او قاري حمزه، د کرنې وزارت استازی انجنیر غلام فاروق، د لښکرګاه ښاروالۍ استازی نعمت الله وفا، د سوداګرۍ او صنعت ریاست استازی عبدالحی مطمئن او د کرنې ریاست استازی انجنیر طاوس خان شامل وو. 
مولوي حقیار په مرکزي زېرمتونونو کې ځای پر ځای شوي غنم له نږدې ولیدل او د معاینې پلاوي ته یې سپارښتنه وکړه، چې د طرزالعمل مطابق له بزګرانو غنم تسلیم کړي، په زېرمتون کې منظم کتارونه جوړ کړي، د کتارونو ترمنځ فاصله مراعت کړي او په منظمه توګه د غنمو ساتنه او پالنه وکړي. 
نوموړي په سیمه کې د بزګرانو او د زېرمتون د مسؤلینو ستونزې او غوښتنې واورېدې او د همکارۍ او ستونزو د حل ډاډ یې ورکړ.