د کرنې او مالدارۍ مرستیال افغانستان لپاره د سویس د پراختیا او همکارۍ ادارې د دفتر له رییس سره وکتل
۱۷ مرغومې ۱۴۰۴ه.ش
۱۷ رَجَب المُرَجَّب ۱۴۴۷ه.ق
د کرنې، اوبو لګولو او مالدارۍ وزارت د کرنې او مالدارۍ مرستیال مولوي صدراعظم عثماني، د افغانستان لپاره د سویس د پراختیا او همکارۍ ادارې د دفتر له رییس اېریک مارکلي او د هغه له مل پلاوي سره د کرنې وزارت په مقر کې وکتل او خبرې اترې یې وکړې.
په دې لیدنه کې دواړو لورو د کوکنارو د کښت د مخنیوي او د بزګرانو د ملاتړ، د اقلیمي بدلونونو، د پراختیایي پروژو د تطبیق او د همغږۍ د پیاوړتیا په اړه بحث او خبرې اترې وکړې.
د کرنې او مالدارۍ مرستیال د کوکنارو د بدیل کښت، د اوبو د مدیریت، د ځنګلونو د جوړولو، له وچکالۍ سره د مبارزې او د بزګرانو د ملاتړ په برخو کې د ملي او نړۍوالو بنسټونو پر همکارۍ ټینګار وکړ او ویې ویل، چې اوس د دې وخت رارسېدلی چې پراختیایي پروژې په بنسټیزه، شفافه او اغېزمنه توګه پلي شي. نوموړي زیاته کړه، چې په تېر کې د کوکنارو کښت خپل اوج ته رسېدلی و، خو اوس منع شوی او بزګران ملاتړ ته اړتیا لري؛ همدارنګه یې د زرګونو روږدو درملنه له مهمو لاسته راوړنو وبلله.
د افغانستان لپاره د سویس د پراختیا او همکارۍ ادارې د دفتر رییساېریک مارکلي د همکاریو پر دوام ټینګار وکړ او ویې ویل، چې د تېر کال په پرتله سږکال زیاته بودیجه لري او د اوبو لګولو د کانالونو د جوړولو، د چاپېریالي ککړتیا پر ضد مبارزې، د اقلیمي بدلونونو او د اصلاح شوو تخمونو د وېش په برخو کې پروژې تطبیقوي.
د وړاندې شوو معلوماتو له مخې، د سویس هېواد هر کال ۲۵ میلیونه سویسي فرانکه د افغانستان د بشري مرستو لپاره ځانګړي کوي، چې موخه یې د خلکو د اساسي اړتیاوو پوره کول، د معیشت پیاوړتیا او د بشري حقونو ملاتړ دی. همدارنګه د سویس د پراختیا او همکارۍ ادارې دفتر په کابل کې په ۲۰۲۵ میلادي کال کې بېرته پرانیستل شوی دی.
