د ځان بسیاینې په پار هڅې؛ د ننګرهار کانال ریاست کې د وطني تولیداتو کارخونه فعال شو
۳۱ غبرګولی ۱۴۰۲ه.ش
۳ ذیالحِجّة ۱۴۴۴ ه.ق
د ننګرهار د کانال ریاست چاراکي وایي، چې ددې کانال اړوندو د زیتونو فابریکه کې د جامو مینځلوصابون، روب او چکنۍ جوړولو چارې پیل شوي دي.
ددې کار موخه هېوادوالو ته وطني او اعلی ډوله صابون، باکیفیته د رومیانو روب او چنکي وړاندې کول دي، چې ورسره به د کانال د عوایدو کچه لوړ او هېوادوالو به د پردیو له احتیاجه خلاص او ترڅنګ یې هېواد ځآن بسیاینې ته یوګام نور هم نږدې کول دي.
د چارواکو په خبره د زیتونو په فابرېکه کې د زیتونو د سوچه او خالصو تېلو او اچارو د پروسس سربېره، اوس په دې فابرېکه کې له کابو درېيو لسیزو وروسته د ځان مینځلو او جامو مینځلوصابون جوړېږي، چې دغه صابون پخپل ترکیب کې یوه اندازه د زیتونو سوچه او خالص تېل هم لري. دغه راز د ننګرهارکانال شرکت د صابون ترڅنګ د رومیانو روب او چکني هم جوړوي، چې په نږدې ورځو کې به د درنو هېوادوالو خدمت ته وړاندې شي.
د ننګرهارکانال رییس مولوي غلام الرحمن کظیم وویل: «له دې وروسته به زموږ درانه ننګرهاریان د پردیو له بې کیفیته صابون، روب او چکنیو څخه خلاص شي، دویته به خپل وطني توکي وړاندې شي».
د ښاغلي کظیم په خبره د رومیانو د روب جوړولو څخه موخه د رومي بانجانو د ضایعاتو مخنیوی، غیر موسمي وخت کې له همدې روبو څخه ګټه پورته کول، د وارداتي روبو مخنیوی د بزګرانو تولیداتو ته بازار موندنه او د کانال ریاست او د بزګرانو د اقتصاد پیاوړي کول دي .
د وطني تولیداتو په زیاتوالي سره به هېواد ځان بسیاینې ته نږدې او ترڅنګ یې کورني او ملي اقتصاد هم پیاوړي کېږي او ورسره خلکو ته دکار زمینه هم برابرېږي.
