د وردګو پوهنتون له څېړنیز مرکز څخه لیدنه وشوه
۳۰ کب ۱۴۰۳ه.ش
۲۰ رَمَضانُ المُبارَک ۱۴۴۶ه.ق
د میدان وردګو ولایت د کرنې، اوبو لګولو او مالدارۍ رئیس الحاج مولوي نیازمحمد عابد او ورسره مل پلاوي د وردګ پوهنتون له څېړنیز مرکز څخه لیدنه وکړه.
د سفر پر مهال، دوی د پوهنتون له رئیس الحاج مولوي صفت الله حقاني او د کرنې پوهنځي له رئیس ایمل ناصري سره وکتل او د څېړنیز مرکز، شنې خونې او نیالګیو کېنولو په اړه یې خبرې وکړې.
د وردګ پوهنتون رئیس، مولوي صفت الله حقاني، د کرنې، اوبو لګولو او مالدارۍ رئیس ته د ښه راغلاست ترڅنګ، د یادو موضوعاتو اهمیت ته اشاره وکړه. همدارنګه، د کرنې پوهنځي رئیس، ایمل ناصري، وویل چې په پام کې ده، د پوهنتون د کانال په شاوخوا کې ۵زره نیالګي کېنول شي، ترڅو د خاورې د ښویدو مخنیوی وشي او هوا پاکه شي.
ورپسې، د کرنې، اوبو لګولو او مالدارۍ رئیس، الحاج مولوي نیازمحمد عابد، د یادو موضوعاتو په اړه هر اړخیز معلومات وړاندې کړل. نوموړي یادونه وکړه، چې د پوهنتون د ښکلا، د خاورې د ښویدو مخنیوي او چاپېریال ساتنې لپاره به ځیني مختلف النوع نیالګي کېنول شي. ټاکل شوې چې د نیالګیو وېش او کېنولو لړۍ د راتلونکې شنبې په ورځ پیل شي.
