د هېواد د شفتالو حاصلات له ۶۵ زره متریک ټنو څخه زیات شوي

۳ لړم ۱۴۰۴ هـ.ش
۳ جُمَادَى الأول ۱۴۴۷ هـ.ق
د کرنې، اوبولګولو او مالدارۍ وزارت د احصایې او کرنیزو معلوماتو ریاست د شمېرو له مخې، سږکال په هېواد کې له بڼونو څخه ۶۵ زره او ۳۴۱ متریک ټنه شفتالو ترلاسه شوي دي.
هرات، پکتیکا، کندهار، بغلان، ننگرهار، میدان وردګ، هلمند، بلخ، غزني، پروان، دایکندي او کاپیسا هغه ولایتونه دي، چې سږکال ترې د شفتالو ډېر حاصلات ترلاسه شوي دي.
اوسمهال په ټول هېواد کې پر ۸ زره او ۴۳۵ هکتاره ځمکه د شفتالو بڼونو جوړ شوي دي. دا مېوه په ډېرو ولایتونو کې ښه وده کوي او د کر او تولید لپاره مناسب اقلیمي شرایط لري.
د کرنې وزارت د معلوماتو له مخې، د دې وزارت تخنیکي او تشویقي ملاتړیز پروګرامونه د شفتالو د کیفیت د لوړوالي او د دې میوې د ترویج په برخه کې مهم رول لوبولی دی.
په هېواد کې د شفتالو بېلابېل ډولونه کرل کېږي، چې له دې ډلې لس ډولونه یې د اقلیمي شرایطو له سازګارۍ او د ښه کیفیت له امله د بڼوالو ترمنځ زیات شهرت لري.
د کرنې، اوبولګولو او مالدارۍ وزارت وایي، د ژر رسو مېوو لکه شفتالو ترویج د تولیداتو د پایدارۍ، د بڼوالو د اقتصاد دي ودې او د مېوو د وارداتو د کموالي په موخه د دې وزارت له مهمو برنامو څخه ده.