د ننګرهار دکرنې ریاست: د جلغوزیو مالیې راټولولو لپاره د طبیعي زېرمو امر پچیراګام ولسوالی ته سفر وکړ
۲۶ تله ۱۴۰۳ه.ش
۱۴ رَبِیعُ الْثاني ۱۴۴۶ه.ق
د ننګرهار د کرنې، اوبو لګولو او مالدارۍ ریاست په لارښوونه، د طبیعي زېرمو امر قاري کاهون عبدالرحمن اتل پچیراګام ولسوالی ته د جلغوزیو د مالیاتو راټولولو او د طبیعي ځنګلونو ساتلو په موخه سفر وکړ.
ښاغلي اتل د پچیراګام ولسوال مولوي سرحد، امنیه قومندان، د فرامینو او ترویج مدیرانو او څارنیزو کمېټو مسؤلینو سره په یوه ناسته کې ګډون وکړ. په دې ناسته کې د جلغوزیو د مالیې راټولولو، د ځنګلونو د ساتنې، جلغوزیو په فني ډول راټولولو، د ځنګلونو د پرې کولو مخنیوي او د ځنګلونو د بیا رغونې په هکله خبرې وشوې.
په ناسته کې د پچیراګام ولسوالۍ ځایي مسؤلینو او څارنې کمېټو د ځنګلونو د ساتنې او پالنې په برخه کې د همکارۍ او همغږۍ ډاډ ورکړ.
د یادونې وړ ده، چې د ننګرهار په یوولسو ولسوالیو کې طبیعي ځنګلونه شته دي، چې د سیمې د ښکلا ترڅنګ د اقلیم بدلون په برخه کې مثبت رول لوبوي.
