د ننګرهار دکرنې ریاست: د ایران قونسلګرۍ له چارواکو سره غونډه دائره شوه

د ننګرهار د کرنې، اوبولګولو او مالدارۍ رياست رییس الحاج مولوی عبدالستار محمد د دې ولایت د بهرنیو چارو ریاست په مقر کې د بهرنیو چارو رییس په ملتیا د ایران قونسلګرۍ له مسؤلینو سره ناسته ترسره کړه.
ناسته کې د کرنې ادارې رییس الحاج مولوی عبدالستار محمد په ننګرهار کې د کرنې او مالدارۍ برخې په پرمختګونو رڼا واچوله او زیاته يې کړه، چې د طبیعي ځنګلونو بیا رغولو، چک ډیمونو او تراسونو جوړولو، د بېرو او پلوڅو ځنګلونو احداثولو، د چرګانو او کبانو هچرۍ جوړولو، شنو خونو او سړو خونو جوړولو او همدا راز د سبو او مېوو د پروسس مجهزې فابریکې جوړولو سره به نورهم په ننګرهار کې کرنه او مالدارۍ پیاوړي شي او د کروندګرو او مالدارانو په اقتصاد کې به ښه والی راشي.
ورته مهال د ایران قونسل ژمنه وکړه، چې د کرنې او مالدارۍ سکټور د لا پرمختګ لپاره به اړیني پروژې په ننګرهار کې پلی کړي، او هم به د کرنې برخې ایراني متخصصینو له لوري کروندګرو ته د وړتیا لوړونې برخه کې روزنې ورکړي.