د میدان وردګو ولایت د کرنې ریاست د اوبو مدیریت او کارموندنې په موخه بېلابېلې پروژې پیل کړې

د میدان وردګو ولایت کرنې، اوبولګولو او مالدارۍ ریاست د ستارز مؤسسې په تخنیکي مرسته او د ملګرو ملتونو دخوړو او کرنې ادراې «اف اې او» په مالي همکارۍ په نرخ، جغتو او دایمیرداد ولسوالیو کې د اوبو مدیریت او کارموندنې پروژې پیل کړې، چې پکې د چکډېمونو او ترنچونو کوچنۍ ساختماني پروژې او د کار په مقابل کې د نقدو پیسو پروژې شاملې دي.
د میدان وردګو ولایت کرنې ریاست د ستارز مؤسسې او «اف اې او» په همکارۍ، د اوبو د مدیریت او خلکو ته د کارموندنې په موخه ګڼې پروژې پیل کړې دي. دا پروژې، چې مخکې د ستارز او طبیعي سرچینو کارمندانو په همکارۍ سروې شوې وې، اوس یې عملي چارې په نرخ، جغتو او دایمیرداد ولسوالیو کې پیل شوې. د دې پروژو په لړ کې د ګودر، حوض، کاریزونو او د کالیو مینځلو ځایونو ۱۵ کوچنۍ ساختماني پروژې او په واترشېډ برخه کې د ۷۲زره ترنچونو جوړول او ۲۵ د ګبیونو چکډېمونو جوړول شامل دي.
د پروژو ټولیز لګښت ۳۱۵ زره او ۳۶۲ امریکایي ډالر دی. د دې پروژو له لارې یوزر او ۲۰۰ کسانو ته د کار زمینه برابره شوې ده. چې هر کس ته به د یادو پروژو تر بشپړېدو چې څلوېشت ورځې کېږي، د ۲۰۰ ډالرو معادل نقدې افغانۍ ورکړل شي. د کرنې ریاست موخه د اوبو مدیریت، بزګرانو ته د اسانتیاوو برابرول او خلکو ته د کارموندنې زمینې برابرول دي، ترڅو د میدان وردګو ولایت کرنیزه وده وکړي او د ځمکې لاندې اوبو په تقویه کې پرمختګ رامنځته شي.