د سویابینو دودولو او پراختیا په پار ۴۲۰ ننداریزې کروندې جوړېږي

۱۵غویی ۱۴۰۰
د کرنې، اوبولګولو او مالدارۍ وزارت په ۱۴۰۰م کال کې د سویابینو دودولو او پراختیا لپاره د هېواد په یو شمېر ولایتونو کې د سویابینو ۴۲۰ ننداریزې کروندې جوړوي.
د کرنې وزارت د ۱۴۰۰م کال د پلان له مخې د هېواد په ۱۷ ولایتونو هرات، سرپل، کندز، بلخ، خوست، ننګرهار، تخار، سمنګان، فاریاب، جوزجان، بغلان، کاپیسا، هلمند، کندهار، لغمان، پکتیا او پراون ولایتونو کې د سویابینو ۴۲۰ ننداریزې کروندې جوړېږي.
دا ننداریزې کروندې د عصري ټکنالوژیو د پېژندنې په پار هر یو یې په یو جریبه ځمکه کې کروندګرو ته جوړېږي تر څو له دې لارې کروندګرو ته د سویابینو د کرکېلې نوي لارې چارې ورزده او لا پراختیا ورکړي.
د سویابینو کرکېله په ۲۰۰۳ ام کال کې دود شوې ده، چې اوس په یو مهم کرنیز توکي بدل شوې او د هېواد په ډېرو ولایتونو کې کرل کېږي. د کرنې، اوبولګولو او مالدارۍ وزارت د سویابینو د ترویج او پراختیا په پار په مرکز او ولایتونو کې بزګرانو ته د سویابینو ننداریزې کروندې جوړ کړي دي او دا لړۍ روانه ده.