د سمنګان پر بزګرانو د غنمو ۲۰۰ټنه اصلاح شوي تخمونه او سرې وېشل کیږي
۱۸ لړم ۱۳۹۹
د سمنګانو ولایت پر زرو بزګرانو د غنمو د ۲۰۰ مټریک ټنه اصلاح شویو تخمونو او کیمیاوي سرو د وېش لړۍ پیل شو.
د سمنګان ولایت د کرنې، اوبولګولو او مالدارۍ رییس محمدرحمن ارغندیوال وایي، چې د غنمو ۵۰ مټریک ټنه اصلاح شوي تخمونه، ۵۰مټریک ټڼه توره سره او ۱۰۰مټریک ټنه سپیه کیمیاوي سره د سبسایډي په ډول د برخمن شویو بزګرانو په ۴۰ او د کرنې وزارت په ۶۰ سلنه لګښت وېشل کیږي.
د سمنګانو ولایت د کرنې رییس زیاته کړه، چې د دغو اصلاح شویو تخمونو او کیمیاوي سرو د وېش موخه په دې ولایت کې د غنمو د حاصلاتو لوړول دي.
هغه وویل: «دغه اصلاح شوي تخمونه د تجربې پر اساس تېرکال په هېواد کې تولید او تکثیر شوي دي، چې د هېواد له خاورې او هوا سره مطابقت لري او د غنمو د نورو تخمونو په پرتله ډېر حاصل ورکوي.»
