د بڼوالۍ ځنځیري ارزښت پروژې له خوا د کچالو ۳۸۸ زېرمتونونه جوړ شوي دي

۲۱ لړم ۱۳۹۹
د کرنې، اوبولګولو او مالدارۍ وزارت د کرنیزو محصولاتو مدیریت اړوند د کچالو ۳۸۸ زېرمتونونه د بڼوالۍ ځنځیري ارزښت د پراختیا پروژې له لارې جوړ کړي دي.
دغه زېرمتونونه چې د هېواد په اوو ولایتونو کې جوړل شوي دي، رغنیزې چارې یې د کرنې وزارت د بڼوالۍ ځنځیري ارزښت د پراختیا  پروژې له خوا تر سره شوي دي. ددغو زېرمتونونو لویه برخه بشپړ شوي او یوازې د پنځه سلنه هغو چارې پاتې دي.
دغه زېرمتونونه هر یوه یې د ۱۲تر۱۵مټریک ټنه کچالو د ساتنې وړتیا لري، چې د رغولو ټولیز لګښت یې ۲۳۷میلیونه او ۸۱۹زره او ۴۳۲ افغانۍ ده. ددې لګښت ۸۰ سلنه د کرنې وزارت او ۲۰ سلنه نور یې د برخمن شویو بزګرانو له خوا ورکړل شوي دي.
ددغو زېرمتونونو په ګتې اخیستنې سره نږدې پنځه زره مټریک ټنه کچالو زېرمه کیږي.
دغه زېرمتونونه د کابل، بامیان، غزني، میدان وردګ، پکتیا، پکتیکا او لوګر په ولایتونو کې جوړ شوي دي.