د ایران د کرنیزو څېړنو، روزنې  او ترویج مرکز څخه د افغانستان د کرنې وزیر لیدنه

د کرنې، اوبولګولو او مالدارۍ وزیر مولوي عطاء الله عمري ایران ته د خپل سفر په ترڅ کې د هغه هېواد د کرنیزو څېړنو، روزنې  او ترویج مرکز څخه لیدنه وکړه.
مولوي عطاء الله عمري او ورسره پلاوي د ایران د کرنیزو څېړنو، روزنې  او ترویج مرکز څخه د لیدنې پرمهال د یاد مرکز له چارواکو سره هم وکتل.
په دې کتنه کې د بوټو ساتنې، د نباتاتو د ناروغیو او افتونو، د سیروم او واکسیناسیونونو جوړولو، د الوتونکو او حیواناتو او د کرنیزو څېړنو په اړه بحث او د نظر تبادله وشوه، چې د ایران د کرنیزو څېړنو، روزنې او ترویج مرکز چارواکو په دې اړه معلومات ورکړل. 
په ورته وخت کې د کرنې، اوبولګولو او مالدارۍ وزیر او ورسره پلاوي د الوتونکو او حیواناتو د ساتلو له کلیکسون او د مرخېړیو د تولید او پالنې له مرکز څخه هم لیدنه وکړه.
د ایران د کرنیزو څېړنو، روزنې  او ترویج مرکز یو له هغو موسسو څخه دی چې د کرنې وزارت تر چتر لاندې فعالیت کوي.
ددې سفر په ترڅ کې، په تهران کې د افغانستان د اسلامي امارت سفیر فضل محمد حقاني، دبوټو ساتنې رییس انجینر عتیق الله مسلم، د کرنې وزارت د څارویو د روغتیا رییس ډاکټر مختار محسني او د کرنې وزارت سلاکاران میرویس خوګیاڼی، حشمت الله شهراني او برکت الله د کرنې وزیر ملتیا کوله.
ټاکل شوې د افغانستان د اسلامي امارت د کرنې، اوبولګولو او مالدارۍ وزیر مولوي عطاء الله عمري او ورسره مل پلاوی به د دغه سفر په لړ کې د ایران د کرنې وزارت له مسوولینو سره وګوري او د کرنې او مالدارۍ په برخه کې د همکاریو د لا پیاوړتیا او د افغان کروندګرو لپاره د کوکنارو د کرکيلې د بدیل د رامنځته کولو په برخه کې د ایران ایران هېواد د همکاریو پر پراختیا خبرې وکړي.