د افغانستان په زیانمنونکو ټولنو کې د معیشت ښهوالي او د مقاومت پیاوړتیا پروژه د درېیو نورو کلونو لپاره وغځول شوه
۲۷ غویی ۱۴۰۵ه.ش
۳۰ ذُو ٱلْقَعْدَةِ ۱۴۴۷ه.ق
د افغان اېډ مؤسسې مسؤلین وایي، د «افغانستان په زیانمنونکو ټولنو کې د معیشت ښهوالي او د مقاومت پیاوړتیا» پروژه، چې تر دې وړاندې د هېواد په شپږو ولایتونو کې د یوه کال لپاره پلې شوې وه، د درېیو نورو کلونو لپاره هم وغځول شوه.
د دغې مؤسسې مسؤلینو د کرنې، اوبولګولو او مالدارۍ وزارت د کرنې او مالدارۍ له مرستیال مولوي صدراعظم عثماني سره په لیدنه کې وویل، چې یاده پروژه به په شپږو ولایتونو کې د خپلو پروګرامونو له پلي کېدو وروسته تر ۲۰۲۹ میلادي کال پورې دوام وکړي.
د یادې مؤسسې د چارواکو په وینا، د دغې پروژې نوې بودیجه ۲۴ میلیونه برتانوي پونډه ده، چې هر کال به یې د پروګرامونو د پلي کېدو لپاره اته میلیونه پونډه ځانګړې کېږي او لګښت یې د بریتانیا له لوري تمویلېږي.
په دې لیدنه کې مولوي صدراعظم عثماني د پروژو پر دقیق، شفاف او اغېزناک پلي کېدو ټینګار وکړ او له مؤسسو یې وغوښتل، چې د کرنې په برخه کې بنسټیز او پراختیایي پروګرامونه عملي کړي.
کرنه، اوبولګونه، مالداري او د کرنیزو محصولاتو بازارموندنه د دغې پروژې له مهمو برخو څخه دي او دا پروګرام د افغان اېډ مؤسسې له لوري د څو همکارو بنسټونو په همغږۍ پلې کېږي.
