دکندهار بولدک کې د نږدې شپږ میلیونه افغاینو په لګښت د درېیو کانالونو رغنیزې چارې پیل شوې
۲۴ لړم ۱۴۰۳ه.ش
۱۲ جُمَادَى الأول ۱۴۴۶ه.ق
د کندهار د کرنې، اوبو لګولو او مالدارۍ ریاست په هڅو، د ملګرو ملتونو د پراختیایي پروګرام (یو. ان. ډې. پي) ادارې په مالي ملاتړ، او د یو خصوصي ودانیز شرکت په تخنیکي همکارۍ د سپین بولدک ولسوالی په زنانه مارکیټ، کسیِ او ستون کاریز سیمو کې د ۵.۸ میلیونه افغانیو په ارزښت د اوبو رسولو درې کانالونه جوړېږي، چې د یادو کانالونو له ډلې د زنانه مارکیټ د اوبو رسولو کانال رعنیزې چارې رسماً پیل شوې. د یاد کانالونو جوړېدو چارې د کندهار طبیعي سرچینو آمریت تر مستقیمې څارنې لاندې پرمخ وړل کېږي.
د کندهار دکرنې ریاست چارواکي وایي، چې د زنانه مارکیټ کانال به د ۱۸۰ متره په اوږدوالي، ۵ متره په پراخوالي او ۱،۳۰ مترو په لوړوالي سره په اساسي او پایدار ډول جوړ شي. د یاد کانال جوړېدو سره سم ۱۰ تنو ته په فني او ۳۰ تنو ته په غیرفني برخو کې د کار زمینه برابره شوې ده. د یاد کانال جوړېدو چارې به د ۴۵ ورځو په لړ کې بشپړ شي.
دا کانال چې د بولدک ولسوالی د کرنیزو ځمکو او بڼونو خړوبولو په موخه جوړېږي، د سیمې د زرګونو بزګرانو لپاره د اوبو د دوامداره او خوندي لاسرسي په برخه کې یو مهم پرمختګ رامنځته کېږي او د اوبو رسولو کې به د یادې سیمي وګړو ته اسانتیا رامنځته شي.
