دننګرهار رودات کې د نږدې ٩.٥ میلیونه افغانیو په لګښت د اوبولګولو دوه پروژې ګټې اخیستنې ته وسپارل شول

د ننګرهار د کرنې، اوبولګولو او مالدارۍ ریاست په هڅو د ملګرو ملتونو د خوړو نړیوال پروګرام (WFP) په مالي او د «FGA» مؤسسې په تخنیکي همکارۍ  د دې ولایت د  روداتو ولسوالی د حصارک او قلعه میرجی کلیو کې د اوبولګولو په برخه کې د سربندونو او کانالونه د دوو پروژو د بیا رغولو چارې بشپړې او د یوې سترې غونډې په ترڅ کې ګټې اخیستنې ته وسپارل شول.
په دې اړه جوړه شوې غونډه کې، د ننګرهار دکرنې، اوبولګولو او مالدارۍ ریاست مرستیال، د یاد ولسوالی سیمه ییزو چارواکو، د «FGA» مؤسسې چارواکو، قومي مشرانو او د سیمې یوشمېر اوسیدونکو ګډون درلود.
 غونډه کې د ننګرهار د کرنې ریاست مرستیال قاري فضل الرحمن صادق وویل، چې د ٩ میلیونه او ٤ سوه زره افغانیو په لګښت د قلعه میرجی او حصارک کلیو کې ١٠١ متره سربند، ٢٢٧ متره استنادې دیوال، ٣٥ متره کانال په اساسي ډول رغول شوي دي.
 دغه راز ٣٦٤٣ حلقې د اوبو ډنډونه (ترنج) جوړ او خوا او شاه کې یې بوټې کښېنول شوي دي او همداراز ٤٠ کیلو متره کانالونه پاک کارې شوي دي. 
ددغو پروژو په پلي کولو سره نږدې ٢٥٠٠ جریبه کرنیزه ځمکه خړوبه او د سېلابونو له ګواښه ژغورل شوي دي.
 صادق پر قومي مشرانو غږ وکړ چې د دغو پروژو په ساتنه او مراقبت کې پوره پاملرنه ولري او تخریب ته يې پرې نږدې، 
دغه راز په دې غونډه کې،  د قومي مشرانو لخوا د ننګرهار د کرنې ریاست کړنې وستایل شوې او د کرنې ریاست مرستیال ته يې د هرراز همکاریو ډاډ ورکړ.