دمالدارۍ سکتور پیاوړتیا په پار هڅې؛ ننګرهارکې پر لسګونو مالدارانو د شړمبو شاربلو ماشینونه ووېشل شوې
۲۰ کب ۱۴۰۲ه.ش
۲۹ شَعبان المُعَظّم ۱۴۴۵ه.ق
د ننګرهار د کرنې، اوبولګولو او مالدارۍ ریاست په هڅو د افغانستان لپاره د هالینډ کمېټې په تخنیکي همکارۍ او د اروپایې ټولنې په مالي لګښت د ننګرهار په څلورو ولسوالیو کې مالدارانو ته د شړومبو شاربلو ماشینونه ورکړل شوي دي.
د ننګرهارد کرنې، اوبولګولو او مالدارۍ رییس مولوي عبدالستار محمد وویل، چې د هالینډ کمېټې له لورې په بهسود، سرخ رود، کوزکونړ او کامې ولسوالیو کې ۱۰۰ تنو مالدارانو ته د شړومبو ماشینونه ورکړل شوي دي.
دغه راز نوموړي وویل د یادې موسسې له لورې د ننګرهار په لسو ولسوالیو بهسود، رودات، چپرهار، سرخ رود، خوږیاڼو، شیرزاد، حصارک، دره نور، کوزکونړ او کامه کې ۸۰۰ مالدارانو ته د مالدارۍ پیاوړتیا او د حیواني محصولاتو زیاتوالي په موخه خوراکي خښتي یا منرال بلاک هم ورکړل شوي دي.
په یادو شویو ولسوالیو کې ۸۰۰ مالدارانو ته د څارویو د لنګون وروسته ستونزو، د غلانځي د التهاب، حفظ الصحې مراعتولو، ساري ناروغیو او ګڼو نورو برخو کې روزنه ورکړل شوي دي.
د افغانستان لپاره د هالینډ کمېټه په ننګرهار کې د مالدارۍ سکتور پیاوړتیا لپاره د واکسینونو، چینجیو ضد درملو، حیواني خوراکي او نورو برخو کې د مالدارانو لاسنېوي کوي.
