خوست کې د واټر شیډ پروژې چارې پیل شوې

د خوست دکرنې، اوبولګولو او مالدارۍ ریاست له خوا د «ان،اې،سي» مؤسسې په همکارۍ ددې ولایت د مرکز اړوند شیخ زاید پوهنتون ته څېرمه د واټرشيډ پروژې چارې پیل شوې، چې لسګونو کسانو ته په کې د کار زمینه برابره شوې ده.
ددې پروژې په پرانیست غونډه کې د خوست دکرنې ریاست چارواکي وویل، چې یاده پروژه د خوست دکرنې ریاست تر څارنې لاندې د «ان،اې،سي» مؤسسې په تخنیکي همکارۍ پلي کېږي، چې ۱۰۰ کسانو ته په کې د کار زمینه برابره شوې او د ۴۰ ورځو په ترڅ کې به یې رغنیزې چارې بشپړ او ګټې اخیستنې ته به وسپارل شي.
ددې پروژې په ترڅ کې ۶۶۰۰ ټرینچونه یا وړې کندې کېندل کېږي، چې ټولیزه بودیجه یې ۲۰ زره او ۳۵۰ امریکایي ډالرو ته رسېږي.
ددې پروژې د پلي کولو موخه د باراني اوبو مدیریت او په ټوله کې خلکو ته کاري فرصتونه برابرول دي.