خوست کې د اناکو متراکم بڼونو څخه څارنه ترسره شوه
۱۸ زمری ۱۴۰۴ هـ.ش
۱۵ صَفَر المُظَفَّر ۱۴۴۷ هـ.ق
د خوست ولایت کرنې، اوبو لګولو او مالدارۍ ریاست اړوند د موسی خیلو ولسوالی کرنیزو چارو عمومي مدیریت کارکوونکو، د (او،آر،ډي) مؤسسې او د ملګرو ملتونو د خوړو او کرنې ادارې «اف،اې،او» استازو په ګډه د موسی خیلو ولسوالی د اناکو جوړو شوو متراکمو بڼونو څخه څارنه او نظارت ترسره کړ.
یاد بڼونه چې له مخکې یې نقشه او سروې بشپړه شوې وه، د سیمې پنځو بزګرانو ته د یوه جریب او دوه بسوې باغ جوړولو په موخه په مجموع کې ۳۵۰۰ د اناکو نیالګي (هر بڼوال ته ۷۰۰ نیالګي) وېشل شوي وو.
د دغو متراکمو بڼونو د څارنې لپاره د «اف،اې،او» ټیم له مرکز کابل څخه خوست ولایت ته راغلی و. یاد پلاوی د بڼونو د کتنې ترڅنګ بڼوالو ته اړینې او عملي لارښوونې وړاندې کړې.
همدارنګه، پلاوي د موسی خیلو ولسوالی کې د شین زر شرکت له فعالیتونو څخه هم لیدنه وکړه، چې د ارزونې پر مهال یې د دغه شرکت کارونه مثبت وبلل او د لا ښهوالي لپاره یې لازمې مشورې ورسره شریکې کړې.
