جمهوررئیس: دولت له وچکالۍ سره د مبارزې لپاره ځانګړي تدابیر نیولي
د جمهوررئیس محمد اشرف غني په مشرۍ له وچکالۍ سره د مبارزې او کورنیو بېځایه شویو ته د رسیدګي په اړه غونډه نن مازدیګر په ارګ کې ترسره شوه.
په پیل کې، د چارو ادارې لوی رئیس، طبیعي پېښو ته د رسېدو په چارو کې د دولت وزارت، د کلیو او پراختیا، د کرنې او مالدارۍ، د عامې روغتیا او مالیې وزارتونو مسوولینو او د سیمه ییزو ارګانونونو خپلواکې ادارې استازي خپل راپورونه وړاندې کړل.
جمهوررئیس د راپورونواو معلوماتو تر اورېدو وروسته وویل، باید په ټول هیواد کې کورنیو بېځایه شویو او وچکالۍ ځپلو ته متوازنې مرستې او خدمتونه برابر شي. انجیوګانې او بهرنۍ مرستندویه موسسې دې د دولت د لومړیتوبونو په چوکاټ کې د روښانه اصولو پر اساس خدمتونه وړاندې کړي.
همداراز جمهوررئیس غني یادو مسوولینو ته لارښوونه وکړه چې روغتونونو او تعلیمي او تحصیلي مرکزونو ته لا زیاته پاملرنه وکړي او دولتي مامورینو ته یې په قسطونو د کورونو د وېش پروسې پر چټکتیا ټینګار وکړ.
د هیواد جمهوررئیس د غونډې په پای کې د حکومتولۍ پر ډیجیټلي کېدو او د اداري فساد پر وړاندې پر اغېزناکې مبارزې د ټینګار ترڅنګ وویل، دولت له وچکالۍ سره د مبارزې لپاره ځانګړي تدابیر په پام کې نیولي دي.
