اروزګان کې پر درې زره بزګرانو د غنمو اصلاح شویو تخمونو او کیمیاوي سرو وېش لړۍ پیل شو
۳ لړم ۱۴۰۲ه.ش
۱۰ ربیعالثاني ۱۴۴۵ ه.ق
د اروزګان ولایت دکرنې، اوبولګولو او مالدارۍ ریاست د ملګرو ملتونو د خوړو اوکرنې ادارې په مالي ملاتړ او د «او.اچ.ډبلیو» مؤسسې په تخنیکي همکارۍ ددې ولایت پر درې زره مستحقو بزګرانو د غنمو د اصلاح شویو تخمونو او کيمياوي سرو وېش لړۍ پیل کړی دی.
ددغو مرستو د وېش لړۍ په پيل غونډه کې د اروزګان دکرنې، اوبولګولو او مالدارۍ ریاست چارواکو، د یادې مؤسسې ولایتي مسوول او یوشمېر نور چارواکو ګډون کړی وو.
د اروزګان ولایت دکرنې ریاست چارواکو د ملګرو ملتونو د خوړو او کرنې نړیوال پروګرام له مرستو د مننې ترڅنګ له هغوی وغوښتل، تر څو بزګرانو ته په دغه ولایت کې د مرستو لمن وغځوی، ترڅو د لیرې پرتو ولسوالیو بزګران هم ترې برخمن شي.
د چارواکو په خبره دغنمو یاید اصلاح شوي تخمونه او کیمیاوي سرې د اروزګان ولایت د خاص اروزګان، ګیزاب او چهارچینو ولسوالیو پر درې زره بزګرانو وېشل کېږي، چې په ترڅ کې یې په هر ولسوالۍ کې پر زرو بزګرانو پر هر بزګر ۵۰ کیلو ګرامه د غنمو اصلاح شوی تخم ۵۰ کیلو توره کېمیاوي سره او ۵۰ کیلو یوریا سپینه سره وېشل کېږي.
باید وویل شی یاد بزګران د سروې له مخې اړمن پېژندل شوی وو چې د مرستو تر څنګ ورته د کرکیلې اړوند لازمې لارښوونې هم شوی دی،په یادو مرستو کې
د دې مرستې د وېش موخه د بېوزله بزګرانو ملاتړ او په ټوله کې د دوی د کرنیزو محصولاتو زیاتوالی له لارې د دوی عوایدو زیاتوالي ته زمینه برابرول دي.
