د هلمند بست کلا کې د باراني اوبو مهارولو په موخه چیکډم جوړېږي
٢٧ غبرګولی ۱۴۰۲ه.ش
٢٨ ذو القعدة ۱۴۴۴ ه.ق
دهلمند ولایت د کرنې، اوبولګولو او مالداری ریاست په هلو ځلو د موسمي بارانونو د مهارولو په موخه د بست کلا ریګستان سیمه کې د کوچني توربند په نوم چیکډم جوړولو چارې پیلېږي.
داوبو زېرمه کولو دغه ناور چې ١٠٠ متره اوږدوالی، ٥٠ متره سور او ٣ متره ژوروالی لري ډاکار (DACAAR) مؤسسې په مالي مرسته وروسته له څو لسیزو څخه یوځل بیا رغول کېږي، چې په رغېدو سره به یې په یادو سیمو کې د باران اوبه مهار، د ځمکي لاندي اوبه به ډېرې او د مالدارانو د مالونو لپاره د اوبو چمتو کولو ستونزه به ورسره حل شي.
په همدې موخه د هلمند ولایت د کرنې ریاست اړوند طبیعي سرچینو آمریت کارکوونکو، د ډاکار (DACAAR) مؤسسې استازو او د قراردادي شرکت مسؤلینو له سیمې څخه له نږدې لیدنه وکړه او د چارو د پیل په اړه یې د وسایطو د انتقال په اړه لازم تصمیمونه ونیول.
د یادونې وړ ده، چې تر دې وړاندې هم هلمند کې د کرنې ریاست لخوا د اخند او حسن نيکه په نوم د باراني اوبو مهارلو په موخه چیکډمونه رغول شوي دي، چې دا مهال ترې ګڼ مالداران او کوچیان ګټه پورته کوي.
