لغمان کې د پنبې ۵٠ ننداريزې کروندې جوړېږي

۲۳ چنګاش ۱۴۰۰
د لغمان د کرنې، اوبولګولو او مالدارۍ ریاست په دې ولایت کې د پنبې د کرکېلي د پراختیا او د کتار په بڼه د پنبې د کرکېلي دودولو په پار د پنبې ۵۰ ننداریزې کروندې جوړوي.
 یاد ننداریزې کروندې، د لغمان ولایت په مرکز او اړوندو ولسوالیو کې جوړېږي.
د لغمان دکرنې، اوبولګولو او مالدارۍ رییس محمد جمیل خوشحال وايي، چې د دغو ننداريزو کروندو د جوړولو په پار یې هر بزګر ته  د پنبې ١٢ کیلو ګرامه تخم ،  ٥٠ کیلو ګرامه یوریا ، ٣٥ کیلوګرامه DAP سره ورکړي دي.
ښاغلی خوشحال وایي، چې ۵۰ تنو بزګرانو ته دکتار په بڼه د پنبې کرکېلي، اوبولګول، سره ورکونه، د تخم اندازه، د هرزه بوټو کنټرول،  د کیمیاوي سرو د استعمال وختونه او په ټوله کې د کر څخه تر حاصل ټولولو پورې پر ټولو تخنیکونوبرخه کې  روزنه ورکړل شوې ده.
پنبه د لغمان په ډېرو ولسوالېو کې ښه نتیجه ورکوي.
د یادو ننداریزو کروندو د جوړېدو موخه د پنبې کرکېلې ته د کروندګرو هڅول، د تولیداتو زیاتوالی، کورنیو او نړیوالو مارکېټونو او بازارونو ته د کیفیت تضمین او لا ښه والی دی.