د نیمروز ولایت بڼوال د خرماوو بڼونو جوړولو ته لېوال شوي
۸ چنګاښ ۱۴۰۰
د نیمروز د کرنې، اوبولګولو او مالدارۍ ریاست وایي، چې ددې ولایت بڼوال د خرماوو بڼونو جوړولو ته لېوال شوي دي او ټاکل شوې، چې د پنځو کالو په ترڅ کې په دې ولایت کې د خرماوو ۳۰۰ هکټاره سوداګریزه بڼونه جوړ شي.
یاد ریاست وایي، چې د نیمروز ولایت د نویو بڼونو له ډلې د خرماوو، عنابو او پستې بڼونو جوړولو په پار مناسب اقلیم لري.
دنیمروز د کرنې ریاست وایي، چې په دې ولایت کې د خرماوو د ۳۰۰ هکټاره سوداګریزو بڼونو جوړولو په پار پنځه کلنه برنامه لري او ددې برنامې پر اساس، په ۱۳۹۹یم کال کې په ۲۵ جریبه ځمکه کې د خرماوو بڼونه احداث شوي دي او سږکال هم ۱۲۵ جریبه نور بڼونه جوړېږي. دا بڼونه په سوداګریزه بڼه جوړېږي.
د چهاربرجک ولسوالۍ د رباط د سیمې مخکښ بڼوال شاه محمد هغه بڼوال دی، چې د سوداګریز بڼ لپاره د خرماوو څه باندې ۲۰ زره نیالګي اېښي دي.
