ننګرهار کې د صواتي کانال رغنیزې چارې ۷۰ سلنه بشپړ شوي دي

۵ غبرګولی۱۴۰۰
د ننګرهار دکرنې، اوبولګولو اومالدارۍ ریاست د کرنې وزارت له دویم ملي لومړیتوب څخه د ملاتړ پروژې «SNaPP2» په همکارۍ ددې ولایت په سره رود ولسوالۍ کې د صواتي کانال رغنیزې چارې ۷۰ سلنه بشپړ کړي دي.
ننګرهار کې، د کرنې وزارت له دویم ملي لومړیتوب څخه د ملاتړ پروژې «SNaPP2» سیمه ییز چارواکي وایي، چې یاد کانال یوزرو ۱۸۰ متره اوږدوالی لري او له درېیو کلیو تېریږي، چې د ۲۷۷  هکټارو په شاوخوا کې ځمکه به ترې خړوبه شي.
ددې کانال د جوړولو لګښت اووه میلیونه او ۹۲۰ زره افغانۍ ده، چې د کرنې د پراختیا نړیوال صندوق «IFAD» له خوا تمویلېږي.
د چارواکو په خبره، د یاد کانال په جوړېدو سره به د ځمکې د خړوبولو کچه نوره هم لوړه شي او ترڅنګ یې ګنۍ کورنۍ په نېغه او نانېغه توګه ترې برخمن کېږي، چې ورسره د سیمې بې کارو خلکو ته د کار زمېنه هم برابره شوې ده.
ظابط، چې په یاد کانال کې د کار کولو زمینه ورته برابره شوې خوښ دی، چې له دې لارې کار ورته پیدا شوی او د کور ورځنۍ لګښتونه ترې پوره کوي.
د سره رود ولسوالۍ د صواتي کانال د سیمې اوسېدونکي هم د یاد کانال جوړېدو ته خوښ دی او وایي، چې په جوړېدو سره به یې پاتې ځمکې خړوبې، د سېلابونو اوبه بهمدیریت او د اوبو د ضعیاتو مخه به ونیول شي.
باید وویل شي، چې د کرنې وزارت د همدې پروژې له لارې د ننګرهار ولایت په ګڼو ولسوالیو کې د اوبو لګولو ګڼ شمېر کانالونه هم جوړ کړي دي، چې په زیاته اندازه کرنیزې ځمکې ترې خړوبېږي.