ننګرهار کې د شولو ۱۶۰ ننداریزې کروندې جوړېږي

۱۱ غویی ۱۴۰۰
د ننګرهار دکرنې، اوبولګولو اومالدارۍ ریاست د کرنې وزارت له دویم ملي لومړیتوب څخه د ملاتړ پروژې  «SNaPP2»  په همکارۍ ددې ولایت په اوو ولسوالیو «بهسود، کامه، کوزکونړ، سرخرود، مومندره، لعل پور او دره نور»  کې دکتار په ډول دشولو دعصري کرکېلي د ترویج په موخه د ننداریزو کروندو  دجوړولو په پار پر ۱۶۰ بزګرانو د شولو اصلاح شوي تخمونه او د کرکېلي اړین توکي وېشلي دي.
د کرنې وزارت له دویم ملي لومړیتوب څخه د ملاتړ پروژې « SNaPP2» چارواکي وایي، چې یاد ننداریزې کروندې بزګرانو ته دکتار « RIPA» په ډول دشولو کرلو د نوي او عصري میتودونو د زده کړې او رواجولو په موخه جوړېږي. د دوی په خبره دکرنې وزارت له لورې یادو بزګرانو ته ټول تولیدي عوامل په وړیا توګه ورکړل شوي دي.
د ترلاسه شویو څېړنو پایلې ښیي، که چیرې شولې په محلي ډول دپاشان په شکل وکرل شي نو له یوه هکټاره ځمکه په منځنۍ توګه څلور ټنه شولې په لاس راځي او که چیرې په عصري ډول د کتار په بڼه وکرل شي نو له یوه هکټاره ځمکه  په منځنۍ کچه شپږ  ټنه شولې په لاس راځي.
باید وویل شي، چې تېرکال د کرنې وزارت د همدې پروژې له لارې د ننګرهار په ولایت کې د شولو ۳۵۰ ننداریزې کروندې کرل شوې وې.